إيه اللي ممكن يحصل لو مصر نجحت في المراجعة الخامسة لقرض صندوق النقد الدولي؟  هل الاقتصاد المصري هياخد نفَس جديد ويطلع لقدام؟ ولا التحديات اللي بنواجهها هتخلّي الطريق صعب؟ و إيه الهدف من المراجعة دي .. وإزاي هتأثر على حياتنا اليومية .. وإيه اللي الصندوق شايفه لمستقبل الاقتصاد المصري.

المراجعة الخامسة دي زي امتحان مهم جدًا .. صندوق النقد الدولي بيبص فيها على إزاي مصر ماشية في برنامج الإصلاح الاقتصادي اللي اتفقت عليه معاه .. البرنامج ده بقيمة 8 مليار دولار .. والهدف إن الصندوق يتأكد إن مصر ملتزمة بالسياسات اللي هتخلّي الاقتصاد أقوى .. زي إن الدولة تقلّل تدخلها في السوق .. وتسيب مجال للقطاع الخاص يتحرك بحرية أكبر .. وكمان مرونة سعر الصرف يعني إن الجنيه يتحدد سعره حسب السوق .. لو مصر نجحت في المراجعة .. هتاخد شريحة جديدة من القرض .. ودي هتساعد في زيادة الاحتياطي الأجنبي وتدعم الاقتصاد.

وايه تأثيرات المراجعة على الاقتصاد المصري؟ 
المراجعة دي لو عدّت على خير .. هتكون إشارة قوية للمستثمرين إن مصر جدية في الإصلاحات .. يعني ممكن نشوف تدفقات أجنبية أكتر .. زي اللي حصل لما مصر زوّدت حجم القرض من 3 مليار لـ 8 مليار دولار في مارس 2024 .. الخطوة دي وقتها جذبت استثمارات ساعدت الاقتصاد يعدّي أزمة 2022 .. دلوقتي الاقتصاد نما بنسبة 4.3% في الربع التاني من السنة المالية 2024/2025 .. وده أعلى معدل نمو من سنتين .. مدعوم بقطاعات زي الصناعة والسياحة .. لكن في نفس الوقت .. إيرادات قناة السويس لسة بتعاني بسبب التوترات في البحر الأحمر .. يعني المراجعة دي فرصة .. بس لازم نكون مستعدين للتحديات.

وايه التحديات اللي بتواجه الاقتصاد المصري بالظبط؟ 
أكبر تحديين حسب صندوق النقد هما التضخم والبطالة .. التضخم بيضرب الفئات الضعيفة أكتر .. وده بيظهر في زيادة أسعار السلع الأساسية زي الوقود والخبز .. في مارس 2025 .. التضخم وصل 13.6% .. وده أول ارتفاع بعد 6 شهور انخفاض .. كمان البطالة بتأثر على الطبقة الوسطى .. لأن فرص العمل مش كفاية .. وفوق ده كله .. قرارات زي الرسوم الجمركية الجديدة من الرئيس الأمريكي دونالد ترامب خلّت السوق تخسر تدفقات أجنبية بأكتر من مليار دولار في أبريل 2025 .. وده ضغط على الجنيه اللي وصل لأدنى مستوياته قبل ما يسترد جزء من الخساير.

وايه الآثار الاجتماعية للإصلاحات اللى طالبها الصندوق؟ 
الإصلاحات اللي بيطلبها الصندوق مش سهلة على الناس .. تقليص دعم الوقود والكهرباء بيرفع الأسعار .. وده حصل فعلًا لما مصر زوّدت أسعار البنزين مرتين في 6 شهور .. وكمان سعر الخبز المدعم زاد 300% في مايو 2024 .. أول مرة من 30 سنة .. الزيادات دي بتضغط على المواطن العادي .. وبتخلّي الحياة أغلى .. الرئيس السيسي قال في أكتوبر 2024 إن الضغوط دي ممكن تبقى "لا تُطاق" لو استمرت الظروف الإقليمية الصعبة .. عشان كده الحكومة أطلقت حزمة اجتماعية بـ 200 مليار جنيه .. يعني حوالي 4 مليار دولار .. عشان تدعم الفئات المتضررة.

طب صندوق النقد شايف إيه لمستقبل الاقتصاد المصري؟
صندوق النقد متفائل بحذر .. رفع توقعاته لنمو الاقتصاد المصري لـ 3.8% في 2025 و4.3% في 2026 .. وده أعلى من التوقعات السابقة .. كمان بيقول إن احتياطي النقد الأجنبي ممكن يوصل 73 مليار دولار في 5 سنين .. لكن الصندوق بينبّه إن مصر لازم تكون حذرة .. خصوصًا في خفض أسعار الفائدة .. لأن الضبابية العالمية بسبب الرسوم الجمركية الأمريكية ممكن تسبب مشاكل .. الصندوق شايف إن الطريق للاستقرار محتاج إصلاحات مستمرة .. وإن القطاع الخاص لازم يكون اللاعب الأساسي في النمو.